Asteburuko futbol partiduen aurrerapena

Bolada onean da Bergara, sei puntu jarraian irabazita. | goiena

Hirugarren mailako UDAk liderra hartuko du, eta Aloña Mendik Hernani kontrario zuzena. Bergarak, ostera, azken hiru partiduak irabazi ditu, eta laugarren daude jada.

Aretxabaletak geroago eta tarte txikiagoa du partiduetan barkatzeko, eta geratzen diren 12 jardunaldietatik, Ibarran jokatuko duten partidu bakoitza –guztira zazpi– finaltzat hartu beharko dute, nahiz eta oraingo domekan moduan, bisitari datorren taldea kategoriako liderra izan. 

Zamudio denboraldiko momenturik onenean da, azken bost partiduak irabazita, eta Aretxabaletaren etxeko zenbakiak ez dira onak –garaipen bakarra–, baina egoera horri buelta ematen saiatu beharko dira Valleren eta Barkeroren mutilak (16:30, Ibarra). 

Aloña Mendik ere etxean 

Oñatiko taldeak etxean jokatuko du bigarren astez jarraian, baina domekan (16:30) joan den astekoa baino kontrario gogorragoa izango dute, eurak baino puntu bat gehiago duen Hernani. Martuteneri emandako errepasoak, baina, morala igoko zien (4-0).

Bergarak, domekan 

Erregional preferente mailan, Bergara jada laugarren postuan da, azken hiru partiduak irabazi eta gero. Domekan jaitsiera postuetatik urruntzeko borrokan dabilen Zumaiakoren kontra jokatuko dute (16:30).  

Kategoria berean, Antzuolak eta Aretxabaletak ere etxean jokatuko dute. Antzuolarrek beheko postuetan kontrario zuzena den Ilintxa izango dute aurrean (16:30, Estala), eta Aretxabaletak Beasainen kontra jokatuko du bihar (18:00). Mondrak, azkenik, bigarren postuagatik borrokatzen jarraitu beharko du, oraingoan Soraluzen (zapatua, 17:00). 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.