Foru Aldundiak 'Berdinbidean Gipuzkoa' zerbitzuaren 2016ko programaren berri eman die lurraldeko udalerriei

Markel Olano eta Miren Elgarresta atzoko aurkezpenean.

Gipuzkoako Diputatu nagusiak, Markel Olanok, eta Berdintasun Organoaren zuzendariak, Miren Elgarrestak, aurkeztu dute Berdinbidean Gipuzkoa zerbitzuaren aurtengo plangintza. Ekimenaren helburua da 10.000 biztanletik beherako herriei berdintasun politikak garatzeko laguntza eskaintzea. Lurraldeko udaletako teknikari eta herri ordezkariei aurkeztu dizkiete aurtengorako asmoak.

Zerbitzu hau 2010. urtean jarri zuen martxan Gipuzkoako Foru Aldundiak, Eudelen eta Emakunderen laguntzarekin. Gaur egun Berdinbidean programa Euskal Autonomia Erkidegoko hiru lurraldeetan garatzen da. Adierazi dutenez, programak herri txikiek dituzten zailtasunak hartzen ditu lanerako abiapuntu bezala, herri bakoitzari hurbileko aholkularitza eskainiz.

Azken urte hauetan Gipuzkoako 30 herri inguru hurbildu dira programara. Orain arte, haiekin garatutako lan ildoak bi izan dira nagusiki: alde batetik, emakumeen jabetzea eta parte hartzea, eta bestetik, indarkeria matxisten kontrako lan ildoa.

2016. urteari begira, hiru lan ildo hauen lanketan oinarrituko da zerbitzua: mainstreaming eta gobernantza, balioen aldaketa eta emakumeen jabetza eta indarkeria sexistarik gabeko Gipuzkoa. Hauek garatzeko Foru Aldundiak edukiak ezagutzeko lan prozesuak, aholkularitzarako baliabide teknikoak eta lan ildoen garapena gauzatzeko baliabideak eskainiko ditu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.