Hilero kale-agerraldi bat egingo dute Ordainduk eta Eskuratuk

Leire Kortabarria 2016ko ots. 5a, 08:00
Ordainduren kale-agerraldi bat (artxiboa).

Ordaindu eta Eskuratu elkarteek kale-agerraldiak egingo dituzte hilabetero elkarrekin Arrasaten edo Bergaran (oraindik ez dute erabaki) euren egoera jendeari gogora ekartzeko eta, bestalde, hauteskundeen aurretik, alderdi politikoekin batzartuko dira. Orain arte, Gipuzkoako ahaldun nagusi Markel Olanorekin eta Ogasun diputatu Jabier Larrañagarekin (EAJ) izan dira. 

Urtarrilean, euren eskaera bat betetzea lortu zuten Fagor Etxetresnetako bazkide ohiek: hain zuzen, PFEZen, aparteko zerga kobratu zieten enpresan baja eskatu zuten kooperatibistei, kapital bat berreskuratzen zutelako eta ulertzen zelako ondarea handitu zitzaiela kapital horregatik. Ordaindu elkarteko bazkide gehienek zerga hori bueltatzeko eskatu zioten aurreko foru gobernuari, eta ezezkoa jaso zuten; oraingoak onartu egin die eskaera eta, Ordainduko Mikel Olaberen esanetan, "dagoeneko askok jaso dute bueltan dirua".

Bestalde, Markel Olanori "bitartekari lanak" egin ditzan eskatu diote, eta Ordainduko kideen "arazoa ulertzen" zuela eta "ahal duen guztia" egiteko agindua jaso zuten.

Ordainduk eta Eskuratuk asmoa dute Bizkaiko eta Arabako ahaldun nagusiekin ere egoteko (EAJkoak), eta hiru diputazioek "jarrera bateratua" har dezaten eskatzeko, bai ondasun hazkunde zergaren gainean, baita euren egoera orokorraren inguruan ere.

Salaketa aztertzen

Abenduan Mondragon Korporazioaren aurka ipini zuten salaketa 3. epaimahaia aztertzen ari da. Oraindik ez da tramitera onartu.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak