Merkataritza gune handiek %1,2 gutxiago saldu zuten abenduan, baina urteko balantze positiboa lortu zuten

Euskadiko azalera handiko merkataritza guneen salmentak %1,2 jaitsi ziren 2015eko abenduan 2014ko abendutik, baina urte osoan %0,1 gehitu ziren aurreko urteko emaitzen aldean. 2014ko abendua ezkero ere, %0,2 langile gehiago izan zituzten gune horiek. Eustatek emandako datuak dira.

Eustaten datuen arabera, lan-egutegiko baldintza homogeneoetan, 2015eko abenduan %1,2ko urte arteko jaitsiera nominala izan zuten EAEko azalera handietako salmentek. Elikagaietan %1,7 gutxiago saldu zuten, eta gainerako produktuenetan, %0,8 gutxiago.

Azalera Handia kategorian sartzeko, 2.500 metro koadrotik gorakoa izan behar da saltoki hori.

Salmentak, lurraldeka, hauek izan ziren: Araban %-1,1; Bizkaian %-2,9; Gipuzkoan %+2,2.

Azarotik, salmentak behera

Aurreko hilaren, 2015eko azaroaren aldean, EAE osoan salmentak %0,9 jaitsi ziren nominalki. Elikagaien salmentak %0,1 handitu ziren epe horretan, baina gainerako produktuen salmentak %1,4 murriztu ziren.

Azaroaren aldean, lurraldeka, hauek izan ziren eboluzioak: Bizkaian %+0,1; Araban %-2,9; Gipuzkoan %-1,7.

Termino finkoetan, EAEko azalera handietako salmentak %2,2 murriztu dira urte artean eta %0,7 aurreko hilaren aldean.

2014ko abenduaren aldean, elikagaien salmentak %3,6 jaitsi ziren eta gainerako produktuenak %1,3, euro finkoetan. Lurraldeka: Araban %-1,0; Bizkaian %-3,5; Gipuzkoan %-0,1.

Elikagaien salmentak, prezioen eragina deskontaturik, %0,5 gehitu ziren aurreko hilaren, 2015eko azaroaren aldean, eta gainerako produktuenak %1,4 jaitsi. Lurraldeka, hona hemen eboluzioak: Araban %-2,9; Gipuzkoan %-1,8; Bizkaian %+0,4; termino errealetan.

EAEko azalera handietako langile kopurua %0,3 gutxitu zen 2015eko abenduan azaroaren aldean, urtaro-eraginik gabe.

%0,1 gehiago

Azalera handietako salmentek %0,1eko gehikuntza nominala izan zuten 2015 osoan, aurreko urtearen aldean. Behin prezioen eragina kenduta, %0,2ko tasa erreala izan zuten.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.