Euskadiko turismo enpresa gehiago izan dira Fiturren eta jarduera gehiago egin dituzte

Turismo arduradunak, Euskadiren eskaintza azaltzen.

Euskadiren erakusketa guneak emaitza onak izan ditu Fitur turismo azokan; hala esan du Eusko Jaurlaritzako Ekonomia Garapen eta Lehiakortasun sailak egin berri duen balorazioan. Zifratan, Euskadiko turismo sektoreko %33,8 enpresa gehiago izan dira (96, denetara) eta %26 ekintza gehiago egin dituzte (batzar edo topaketa profesionalak, batik bat; denetara 403 izan dira).

Fiturren 690 stand (%12 gehiago) izan dira, 9.500 enpresa eta 165 herrialde eta lurralde. Euskadik %26 handitu du bere jarduera profesionala azokan. "Aktibitate biziko lau egun” izan dira, Sailaren hitzetan.

Parte hartu duten euskal enpresei dagokienez, 82 pribatuak izan dira, eta 14, publikoak.

Kontsultarako denbora handiagoa

Zapatuko 19:30 arte, 14.622 laguni harrera egin diete Euskadiko gunean; “iaz baino zertxobait gutxiago, baina kualitatiboki askoz interesgarriagoa, kontsulta bakoitzari  eta harrerari eskainitako denbora handiagoa izan delako. Informazio espezializatuagoa eskatzen da, hurrengo bidaia planifikatzeko helburu argiarekin”, esan du Ekonomia Garapen eta Lehiakortasun sailak.


ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.