Fagor Grupo Mueblek batez ere hoteletarako altzariak egiten ditu eta "jarduera zabaldu" ahal izango omen du Maecenas Kapitalek orain. FGM Mondragon taldeko kooperatiba bat zen eta zailtasun ekonomiko handiak izan ditu azken urteotan, altzari salmenten beherakadaren ondorioz. Langileek beste kooperatiba berri bat sortu dute eta horren bidez FGM berriaren zati bati eutsiko diote. Mondragon Inbertsioak atalak ere parte hartuko du proiektu berriaren hasieran.
FGMri norabide aldaketa "handia" emango omen diote, salmentak handitzeko helburuz eta asmoa da 2016an fakturazioak 10 milioi euro gainditzea. Fagor GMren negozioa egonkortuta omen dago hoteletan, atzerrian egindako ibilbideari esker bereziki, eta aurrerantzean ere nazioartea eta AEB izango dira apustu nagusiak.
Francisco Vera presidente berriaren esanetan, gaur egun, 8 milioi euroko eskaria dute nazioartean, Hilton Hotels and Resorts, Accor, Holiday Inn, Melia eta beste kate ezagun batzuetatik.