Iazko epe berean baino %2 heriotza gehiago izan zen apiriletik ekainera arte

2015eko apiriletik ekainera bitartean, 4.816 euskal biztanle hil ziren, 2014ko epe berean baino %2 gehiago, Eustaten datuen arabera. Hiru lurraldeetan egon zen heriotza gehiago: Gipuzkoan, 1.543 heriotza (+%0,1); Bizkaian, 2.675 (+%2,3), eta Araban, 598 (+%6,2).

Hildakoen %51,2 gizonezkoak ziren, eta %48,8, emakumezkoak. 80 urte edo gehiago zituzten hildakoen %63,7k. Hil ziren emakumeen %74,6k zuten 80 urte edo gehiago, eta %53,2k, gizonezkoen kasuan. 100 urte edo gehiagorekin hil ziren 60 biztanle, eta horietatik 51 emakumeak ziren. Bestalde, urte 1 edo gutxiagoko 12 ume hil ziren, 8 mutiko eta 4 neskato.

Heriotza kausa nagusia tumoreak izan ziren: 1.519 heriotza eragin zuten. Zirkulazio-sistemaren gaixotasunak izan ziren kausa 1.278 kasutan; bion artean, heriotzen %58 eragin zuten. Arnas-aparatuko gaixotasunek 429 heriotza eragin zuten (%8,9).

Nerbio sistemaren gaixotasunak (Alzheimer, Parkinson…) gehitu ziren gehien (%9) aurreko urteko hiruhileko beraren aldean.

Gizonen artean, minbizia; emakumeen artean, bihotzeko gaitzak

Gizonen artean tumoreak dira heriotza-kausa nagusia, %50 hilgarriago emakumeen artean baino. Emakumeen artean gaixotasun kardiobaskularrak dira hilgarrien, gizonen artean baino %20 gehiago. Gizonentzat arnas-sistemaren gaixotasunak dira hirugarren heriotza-kausa, %55 hilgarriago emakumeentzat baino; emakumeentzat hirugarrena nerbio-sistemaren gaixotasunak, %34 hilgarriago haientzat gizonentzat baino.

2015eko udaberrian, biztanle-galera gertatu zen EAEn: 142 biztanle gutxiagorekin bukatu zen urtaroa. Gipuzkoan, 62 biztanle gutxiago ziren; Bizkaian, 377 gutxiago, eta Araban, 173 gutxiago.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.