Berrikuntzekin dator aurtengo 'Kameratoia' Durangoko Azokara

Kameratoia, Euskal Herriko XI. ikus-entzunezkoen rallya, Durangoko Azokako Irudienea gunean izango da abenduaren 5etik 8ra. Euskaltzaleen Topaguneak antolatzen du ekimena, eta aurten, nobedade modura, parte-hartzaileek 48 orduren ordez 50 izango dituzte haien lanak ekoizteko, Azokaren mende erdiari keinu eginez.

18 eta 35 urte bitarteko gazteei zuzendutako lehiaketa da. Izena azaroaren 30era arte eman daiteke, www.kameratoia.com gunean eskuragarri dagoen fitxa osatuta.

Parte hartzaileei abenduaren 5ean esango diete zein izango den landu beharreko gaia eta zeintzuk lanek izan beharreko ezaugarriak, eta ordutik aurrera hasi ahal izango dira gehienez sei minutu iraun beharko dituen film laburra ekoizten. Lanak abenduaren 7an entregatu beharko dituzte, 14:00ak baino lehen.

Tokikom saria

Proiekzioa eta sari banaketa ekitaldia abenduaren 8an ospatuko da Durangoko Zugaza zineman. Lehen saria 1.200 eurokoa izango da, eta bigarrena 900ekoa. Aurten lehenengoz, tokiko komunikabideen elkarteak emandako 600 euroko Tokikom saria ere izango da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.