EH Bilduko lau batzarkide herri akusazio gisa aurkeztu dira 'Bidegi auzian'

Koalizioak prentsa ohar bidez jakitera eman duenez, "bide judizialean dena argitu dadin lortu nahian eta Gipuzkoako Foru Aldundiak ikerketa ez duela oztopatzen ziurtatzeko" aurkeztu dira herri akusazio gisa. Ohar berean dio, ustelkeria kasuak aztertzen ari direnean, administrazio publikoak gardentasuna eta inpartzialtasuna bermatu behar dituela, baina kasu honetan, EAJk eta PSE-EEk Batzar Nagusietan Bidegi Auziari buruzko Ikerketa Batzorde bat irekitzea saihestu dutela eta, beraz, argi dagoela ez dutela egia argitu nahi.

Iban Asenjo, Judit Garcia, Inko Iriarte eta Jon Albizua dira herri akusazio gisa aurkeztu diren batzarkideak.

Iban Asenjo batzarkideak azpimarratu du Foru Gobernuaren jokabidea Bidegi Auzian "bereziki kezkagarria" izan dela azken hilabete hauetan: "EAJko Bidegiko zuzendari berria hiru inputaturekin elkartu da, akusazioa zeramaten abokatuak aldatu zituzten, Diputazioko talde juridikoko kide bat (hau da akusaziokoa) bi inputaturen defendatzaile izendatu zuten...".

Horri gehitu diote EAJ eta PSE-EE euren gehiengoa "erabiltzen" ari direla Bidegiko Administrazio Kontseiluan "onartezinak" diren hainbat erabaki hartzeko: "Astelehenean, adibidez, auziarekin zerikusirik ez duten hiru langile kaleratu zituzten. Aldiz, diru publikoa ustez desbideratzeagatik inputatuta dagoen langilea errepide bateko obraren arduradun izendatu zuten, kontutan izan gabe Administrazio Kontseiluak langile hori bera kaleratzea eskatu zuela, baldin eta inputatzen bazuten (eta halaxe gertatu da)".

"Foru Gobernua ez zaigu fidagarria iruditzen Bidegin izan diren ustezko irregulartasunak argitzeko. Horregatik, EH Bilduko batzarkideok ez dugu herri akusazio gisa aurkeztea beste irtenbiderik ikusi", azaldu dute.   

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.