Ford Mugarri nagusi oilarren arteko borrokan

Ford Mugarriko jokalaria jaurtiketa egin nahian.

Derbiak izan behar dituen ezaugarri guztiak izan ditu Ford Mugarri Arrasate eta Izarraitz taberna Aloña Mendi eskubaloi taldeen arteko norgehiagokak: harmailak lepo beteta, giroa bero-bero eta tentsio handia. Orain arte partidurik galdu barik bata zein bestea. Eta gaur Ford Mugarri izan da nagusi oilarren arteko borrokan: 26-19.

Lehenengo zatian indarrak oso parekatuta ibili dira, eta arrasatearrek aurrea hartu orduko berdintzea lortzen zuten oñatiarrek. Azken minutuetan, baina, aurrera egin dute Ford Mugarrikoek eta atsedenaldira joan dira 12-8.

Bigarren zatian aurrera egiteko gogoz irten dute Aloña Mendikoek eta hurbildu ere egin dira, baina, ezin izan dute berdindu. Asier Valle atezainaren lan bikaina tarteko, azkenean gora egin dute arrasatearrek eta bukaeran 26-19. "Orokorrean hobeak izan dira, ez dago zalantzarik, hortaz, eskua eman eta aurrera", esan du bukaeran Andoni Bernalek, iaz Ford Mugarriko jokalari izandakoak eta aurten Aloña Mendin diharduenak. Hala, bosgarren jardunaldian eta partidurik galdu barik, sailkapeneko buruan dago Arrasateko taldea.

Eskerrak agur esan duten hiru jokalariri

Ford Mugarri Arrasate taldean urte askoan jardun eta azken denboraldian agur esan duten hiru jokalari omendu gura izan dituzte atsedenaldian: Kepa Isasmendi, Ekaitz Aranburuzabala eta Oier Ortiz de Mendibil. Zaleen txaloak eta elkartearen opariak jaso dituzte horiek.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.