Kooperatiben ekarpenen auzia epaitegietara eramango dutela iragarri du Ordaindu plataformak. Datarik, baina, ez du jakinarazi. Eta bien bitartean, egueneroko manifestazioekin segitzen dute, azken bi urteotan moduan.
Azkena, atzokoa, Legazpin egin zuten. Tarteka egin ohi duten modura, Mondragon Taldeko buruzagiei (Javier Sotil presidenteari, kasu honetan) presio zuzenagoa egiteko asmoarekin.
"Aurrezkiak aldarrikatzen"
Atzoko manifestazioaren bitartez, Mikel Olabek plataformako bozeramaileak adierazi du "Javier Sotilek eta Mondragon Taldeko bestelako buruzagiek kooperatibismoa zein ondo egiten duten" adierazteak ez dituela "difuminatuko euren lanpostuak galdu dituztenen eta etengabe eta justiziaz euren kredituak eta aurrezkiak aldarrikatzen dituztenen eskakizun bidezkoak (…) Eurek dute irtenbidea, gu berba egiteko gertu gaude beti", adierazi dute, besteak beste.
