Arrasateko eta Oñatiko atletek iazko lehia errepikatzeko itxaropenaz

Mundialean, distantzia luzean (100km) azpitxapeldun izan berri den Asier Cuevas, ezkerrean, plazara sartzen. | goiena

Azken ordura arte ez da jakiterik egongo iaz Oñatiko eta Arrasateko atleten arteko lehia polita bihar (17:00, Arrasateko Portaloia) errepikatu ahal izango den, ala ez. Seguru oñatiarrak errebantxa gogoz egongo direla, gizonezkotan Endika Donnayk irabazi zuelako (0:39:17) eta emakumezkotan Nere Arregi izan zelako onena (00:48:49). Eta hain zuzen, bigarren postuetan bi oñatiar sailkatu ziren, Yeray Varela (00:39:26) eta Estela Biain (00:50:11). 

Emakumezkoen artean lehia ez zen horren estua izan, Arregik bakarrik egin zuelako ia lasterketa osoa eta bi minutuko tartea atera ziolako Biaini. Baina gizonezkoetan Donnayren eta Varelaren artean indarrak parekoago egon ziren. Berez, Arrasatekoa gorputzaldi hobean iritsi zen hitzordura, Varelari goiz harrapatu zion lasterketak, eta hilabete batzuk geroago erakutsi zuen Oñatikoak aurpegirik onena. Hala ere, Varela Oñatiko sarrerara arte Donnayren erritmoari eusteko kapaz izan zen, eta pare bat kilometro geratzen zirenean egin zuen Arrasatekoak aurrera. Erlaxatu ere egin zen Donnay, eta helmugako azken zuzenean ezustean harrapatu zuen Varelak azken 300 metrotan egin zuen ahalegin beteak, ia harrapatu zuen. Hala, 9 segundoko aldeaz Arrasatera eraman zuen txapela –eta txantxikua– Donnayk.    

Hala, iazko irabazleek dagoeneko eman dute izena, baina ordezkari oñatiarrek azken orduan erabakiko dute lasterketan egon ala ez: "Egia esan ondo entrenatu ezinka nabil, Akilesen tendoi biak oso minduta dauzkadalako. Pena handia ematen dit lasterketan ez egoteak, eta azken ordura arte ez dut erabakia hartuko", adierazi du oñatiarrak aste barruan. 

Eguenerako 230 izenemate 

Iaz 280 korrikalari iritsi ziren helmugara, eta gaur, eguena, dagoeneko kopuru antzerako samarral eman du izena, patinatzaile eta korrikalariak kontutan hartuta. Oraindik, baina, badago izena emateko aukera, hemen. Gogoratu egunean bertan ezingo dela izenik eman. Aurten ere 17:00etan hasiko dute proba, baina bai korrikalariek eta baita atletek ere Garibaien hasiko dute lasterketa, eta ez Portaloian. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.