'Loreak' filmak Oscar sarietarako bidea hartu du

Herrialde bakoitzak hautagai bat bidaltzen du Oscar sarietara, eta Espainiako Zinema Akademiak irailaren 29an jakinaraziko du aurtengoa zein den. Dagoeneko hiru aukeratara murriztu dute lehia: Loreak, Magical Girl eta Felices 140. Aurrera egiten duenak atzerriko film onenaren sailean parte hartzeko aukera izango du.

"Sorpresa handia hartu genuen albistea entzutean", dio gidoilari eta ekoizle lanetan aritu den Aitor Arregik. Izan ere, filma euskaraz izateak aukerak mugatuko ote zizkien ardura zuten, fase horretaraino iristen den lehen euskarazko filma baita.

Orain, hautagai nagusia aukeratzeko zain daudela, Arregik uste du akademiko askok gehien gustatzen zaien filma bozkatuko dutela, baina argi dauka: "Filma gazteleraz izango balitz, aukera gehiago izango genituzke".

Dena den, "pozik" dago Loreak filmeko lantaldea, eta ez da harritzekoa, Nobel sariekin batera mundu mailako sari ezagunenetakoak baitira Oscarrak. "Guretzako, eta neurri batean euskal kulturarentzako, oso pauso polita da", aitortu du Arregik.

Duela ia urtebete Zinemaldian estreinatu zutenetik, hara eta hona ibili da Loreak-eko taldea, Arregik dioen moduan, "zarata ateratzen". Ezinbestekotzat dute "filma ikusgarri egitea eta jendearengana helaraztea", akademikoek kontuan har dezaten. Horregatik, hainbat zinemalditan izan dira, tartean Kanadan, AEBetan eta Tokion. Zinemaldi horietan, ordea, hizkuntza ez da arazoa izan, "ohituta" daudelako filmak jatorrizko bertsioan ikusten.

Bide luzea aurretik

Oraindik galbahe asko pasa behar ditu filmak Oscar sarietako alfonbra gorrira iristeko, Espainiako hautagai izateko aukeratuko balute ere, beste hiru hautaketa pasa beharko bailituzke zeremoniara iritsi baino lehen.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.