Kurtzebarriko DBHko ikasleek banatu dituzte zozketetako sariak

Lourdes Urrutia otarrarekin Kurtzebarriko ikaslea eta gurasoa alboan dituela.

Aretxabaletako Kurtzebarri BHIko hirugarren mailako ikasleek datorren ikasturtean Holandako Cujick herriko Merlet Collegerekin egingo dute elkartrukea. Gastuei aurre egiteko hainbat zozketa egin dituzte eta irabazleen berri eman gura izan dute orain. Aretxabaletako otarra jaso du Lourdes Urrutiak, Eskoriatzakoa Gorettik eta asteburuko egonaldiaren irabazlea izan da Ana Ruiz Santos eskoriatzarra.

Hona ikasleek bidalitako idatzia:

"Aretxabaletako Kurtzebarri BHIko 3. mailako ikasleek datorren kurtsoan Holandako Cujick herriko Merlet Collegerekin egingo dute elkartrukea. Bidaiaren gastuak estaltzeko ekintza asko ari dira antolatzen, horien artean egunotan eginiko zozketak: bi otar, Aretxabaletako eta Eskoriatzako dendariek emandako produktuz beteta.

Zozketan parte hartzeko hainbat tabernetan eta dendetan jarri ziren kartulinak, jendeak euro baten truke zenbaki baten alde apustua egiteko, porra erara. Erantzun polita eduki du ekimenak, jende askok parte hartu du-eta. Otarrak erakusgai egon dira, bata Aretxabaletako Durana kaleko Udalaren lokal bateko erakusleihoan, eta bestea, Eskoriatzakoa, Ogiberri okindegikoan. Joan den ostegunean zozketa egin zen eta zenbaki sarituak izan dira Gorettirena (Eskoriatzako Naira tabernan apustua egina) eta Lourdes Urrutiarena (Aretxabaletako Errekabarren fruta-dendan apustua egina).

Goretti, Eskoriatzako otarrarekin.

Bestalde, asteburuko egonaldi bat ere zozketatu da, ikasleek saldutako txartelen artean. Zenbaki saritua 278 izan da, eta Ana Ruiz Santosek erosi zuen. Zorionak irabazleei, eta mila esker kolaboratu duzuen guztiei, bereziki Aretxabaletako eta Eskoriatzako dendariei!"

Ana Ruiz Santos eskoriatzarra.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.