Maiatzaren hamaseiko goizeko saioan, Antzuolako Torresoroan, Arkaitz Oiarzabal "Xamoa" suertatu zen irabazle, eta arratsaldekoan berriz, Egoitz Eizagirre. Goizean hirurogei bat ikus-entzule bildu ziren aretoan, eta arratsaldean ehun inguru.
Era berean, Zaldibian Aitor Urbieta eta Maider Arregi izan ziren garaile, eta domekan Hernanin, Jon Maia eta Ane Labaka. Egun berean, txapelketako bigarren faseko lehen saioa jokatu zen Bergarako Zabalotegi aretoan, berrogeita hamar pertsonaren aurrean. Bertan Ander Lizarralde izan zen onena, eta arratsaldean berriz, Unai Muñoa. Azken saio honek hirurogeita hamar bat bertsozale batu zituen.
Datorren asteburuan atsedenaldia izango du Gipuzkoa Bertsotanek; beraz bi aste barru jarraituko dute bigarren fasearekin, eta Debagoienera itzuliko da txapelketa, maiatzaren 30ean beste bi saio jokatuko baitira Oñatiko Santa Ana aretoan.