Horri denari esker, Laboral Kutxak lortu dituen balantze orekatua, likidezia-maila bikaina eta kapitalizazio-maila altua nabarmentzen ditu. Hori konfirmatuz, Fitch-ek BBB+ kalifikazioa eman dio Laboral Kutxari –Hego Euskal Herriko eta Espainiako bigarren kalifikazio onena–, eta Moody's-ek, Ba1 –laugarren onena.
Nabarmentzeko beste datu batzuk hauek dira: kreditua hazten dabilela baieztatzen dutenak. Izan ere, kontsumorako kredituak %29 hazi dira iazko lehenengo hiruhilekotik hona; enpresendako kredituak, %54; eta hipoteketarako kredituak, %66.
Laboral Kutxak prentsa oharra kaleratu du, hainbat esparrutan egin duen lana baloratuz:
Likidezia
Bezeroen aurrezki-saldoek izandako gorakadaren ondorioz, aurrez lasaia zuen likidezia finkatzen jarraitzen du entitateak. Ondorioz, indartsu dago txikizkako merkatuan nahiz enpresetan inbertitzen jarraitzeko. Hala, bezeroen gordailuen gaineko kredituen ratioa %94,5koa da (emandako maileguen eta dauzkan gordailuen arteko zatiketa), eta txikizkako merkatuan diharduten sektoreko entitateen batez bestekoa % 26,4koa, azken informazio erabilgarriaren arabera.
Berankortasuna eta hornidurak
Kalifikazio-agentziek behin eta berriro agerian jarri dutenez, arriskuen gestioa eta, bereziki, kreditu-arriskuaren gestioa da entitatearen indargune handienetako bat. Ondorioz, berankortasun-tasak beherako bideari eutsi dio eta %8,44koa da, sektorearen batez bestekoa baino apalagoa, hori 2015eko otsailean %12,59ko ratioa baitzen.
Kaudimena (solbentzia)
Kreditu-kooperatibak %13,69ko kaudimen-ratioa du, Common Equitiy Tier 1 (CET1) ratioaren arabera. Sektorean nabarmentzeko moduko ratioa da.
Kreditu-inbertsioa eta aurrezkia
Bezeroei emandako kreditu osoa, hornikuntzak aintzat hartu gabe, 14.003 milioi eurokoa da. Saldoek beherako bidean jarraitzen dute, urtetik urtera %5,13ko beherakada izan baitute.
Aurreko epealdi berberarekin alderatuta, hiruhileko honetan familientzako hipoteka-kredituek %66 eta kontsumo-kredituek %29 egin dute gora. Joera berbera antzeman da enpresentzako finantzaketan, formalizazioen bolumena %54 eta inbertsio hori eskuratu duten enpresen kopuru %29 hazi baitira.
Baliabide bitartekotuen bolumen osoa (partikularren, enpresen eta erakundeen saldoak barne hartuta) 18.217 milioi eurokoa da, urtean %5,15 gora egin ondoren.
Emaitza kontua
Interes-tasa txikiekin jarraitzen du merkatuak. Horrek esan nahi du ohiko banku-negozioko marjinetan presio handia dagoela, oraindik. Halere, Laboral Kutxak errentagarritasun-maila egokiari eutsi dio eta 77,7 milioi euroko interesen marjina eskuratu du. Horri komisioek, dibidenduek eta beste finantza-eragiketa batzuek ekarritako sarrerak gehitu behar zaizkio, eta, guztiak bilduta, 112,8 milioi euroko marjina gordina lortu du. 49,6 milioi euroko administrazio-gastuak kontabilizatu eta hainbat gastutara 22,8 milioi euro bideratu ondoren, zerga ondorengo emaitza indibiduala 33,9 milioi eurokoa izan da. 2014ko lehen hiruhilekoaren aldean %5,2ko hobekuntza izan da, beraz.
Aseguruen negozioa
Aseguruen negozioak mozkin-iturri garrantzitsua izaten jarraitzen du Taldearentzat. Urteko lehen hiruhilekoan merkataritza-jarduera hazi egin da, bai produkzio berrian, bai zorroari eustean. Datu horiei esker eta eraginkortasun-alorreko etengabeko hobekuntzei esker, negozio horrek 6,8 milioi euroko emaitza globala izan du lehen hiruhilekoan, iazko epealdi berean lortutako zenbateko berbera, alegia.
