Antzuolak (26 puntu) liga bukatzeko geratzen diren hiru partiduak irabazi beharko ditu, eta besteen emaitzak ikusi. Aste bukaeran, zaleen laguntza izango du Estala futbol zelaian, Tolosari aurre egin ahal izateko. Domekan izango da partidua, 16:15ean.
Bergararen egoera apur bat hobea da puntu kopuruari dagokionez –29 ditu–, baina maila galtzeko arriskuarekin dago. Oraingoan, gainera, igoera fasean sartzeko lehian dagoen UDAren kontra neurtuko ditu indarrak Aretxabaletan. Muturreko bi helbururen atzetik dauden taldeak aurrez aurre Ibarra futbol zelaian, gaur, zapatua, 17:00etan.
Hain justu ere, Bergararen kontrako derbia irabazita ziurtatu zuen maila Aloña Mendik. Igor Serranoren taldeari kosta egin zaio helburua betetzea, baina azken hiru jardunaldietan lasai jokatuko du. Domekan, Ondarroako Aurreraren bisita izango du Azkoagainen, 16:30ean.
Erregional Preferentea
Bestalde, Mutrikurekin lehia bizia du Mondrak. Azken jardunaldian elkarren kontra jokatuko dute eta lehia erabakigarria izan daiteke. Horren aurretik, baina, Mondrak Zumarragan irabazi beharko du eta kostaldekoek punturen bat galdu beharko dute aste bukaeran. 16:00etan hasiko da partidua.
