Ezker Anitza-IUk III. Errepublika aldarrikatuko du bihar, domeka, Eibarren

"Gure gizartean gero eta beharrezkoagoak diren errepublikaren balioak –berdintasuna, justizia soziala, parte-hartzea eta subiranotasuna– aldarrikatzeko hainbat ekitaldi egingo ditugu bihar, Eibarren", jakinarazi dute Ezker Anitza-IU alderdiko kideek. 10:30ean hasiko dituzte ekitaldiok Ermuako Orbe kardinalaren plazan, Gazte Komunistak taldeak egingo duten ohiko martxa errepublikanoarekin eta 12:00etan ekitaldi politikoa izango da Eibarko Untzaga plazan.

Martxa errepublikanoa Ermutik Eibarko Untzaga plazaraino egingo dute eta ondoren, 12:00etan, ekitaldi politikoa izango da honako kideekin: Eibarko Irabazi ekimeneko alkategai Itoitz Garcia Anton; Gipuzkoako Ezker Anitza-IUko kide Arantza Gonzalez; PCE-EPKko idazkari nagusi Jon Hernandez; eta Ezker Anitza-IUko koordinatzaile nagusi Isabel Salud.

Musikak girotuko du ekitaldia eta bukaeran errepublikaren bandera igoko du Marcelo Usabiaga borrokari antifaxista beteranoak.

Herritarrak gonbidatuta

Ezker Anitza-IUk herritarrak gonbidatu ditu ekitaldiotara: "Errepublikaren balioen aldarrikapen ekitaldiok partekatu gura ditugu etorkizuneko apustu direlako, eta egungo erregimenarekin apurketa demokratikoa lehenbailehen egin behar delako hirugarren errepublika baten aldeko prozesua abian jartzeko".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.