Gaur bertan (eguaztena) egingo du hobera eguraldiak, nahiz eta goiza grisetik joan. Eta bihar izango da Aste Santuko egunik dotoreena; Arrasaten 17 graduraino iritsiko dira tenperatura maximoak. Hori bai, minimoak baxuak izango dira: 3 gradu inguru honetan, eta baliteke Arabako eta Nafarroako zenbait lekutan izotza ere egitea.
Egubakoitza
Aldaketa gutxi ekarriko ditu egubakoitzak. Tenperaturak, maximoak zein minimoak, gorago ibiliko dira, eta nahiz eta zeruan hodei bakan batzuk ikusi, ez dute trabarik egingo.
Zapatua, domeka eta astelehena
Larunbatean, berriz, muturra apurtxo bat okertuko du eguraldiak, eta euriaren bisita izango da, bereziki, goiz partean. Tenperaturak ere beherago daudela igarriko da. Edozein modutan, arratsaldean ostarteak zabaltzen hasiko dira.
Eta joera hori izango da nagusi domekan: alegia, egun argitsua, eta tenperaturak goranzko joerarekin.
Aste Santuko azkeneko egunari dagokionez, Euskalmetek gaur dakarren iragarpenaren arabera, okertzera egingo du, tenperatura aldetik zein laino kopuru aldetik; nahiz eta ez den euririk aurreikusten.