Aretxabaletako batzokia jendez bete zen Jon Darpon osasun sailburuaren berbaldia entzuteko. Hala, osakidetza zerbitzu publiko, duin eta kalitatezkoa dela defendatu zuen, baina gaineratu zuen baliabide guztiak ondo kudeatzeak zelako garrantzia duen, batez ere krisiak astindu gaituen honetan: "Proiektuaren erdia dagoeneko gauzatu dugu, eta gobernu taldeak marraztutako bost lan-lerroak azalduko ditugu", azaldu zion GOIENAri berbaldia hasi baino minutu batzuk lehenago.
Herritarrak, guztiaren gainetik
Bost lan-lerro horietan lehena pertsonak dira, herritarrak: "Herritarrari eskaintzen zaion osasun zerbitzua da hau, publikoa eta unibertsala. Zergetatik finantzatzen dena, eta kalitatezkoa. Hau da, azken 31 urteotan izan dugun zerbitzua da. Bigarrengoz, garbi izan behar dugu gurea zahartzen dabilen gizartea dela, hau da, populazio geroago eta helduagoa dugula, eta gaixotasun kronikoek gora egingo dutela. Hala, horren aurrean neurriak hartzen ari gara, esaterako, zerbitzua etxebizitzetara gerturatuz.
Zerbitzu iraunkorra
Hirugarren lan-lerroa zerbitzuaren iraunkortasunarena da: "Ondo dakigu krisiak ze eragin izan duen, eta badakigu diru gutxiago dugula. Hala, kalitatezko zerbitzua izaten jarraitzeko baliabideak ondo kudeatzen jakitea ezinbestekoa da, eta eraginkorrak izan behar dugu. Laugarren puntua, berriz, Osakidetzako langileei eskaini beharreko arreta da. Pertsonak zaintzen ditugun pertsonak gara, horrenbestez, Osakidetzako langileek ere arreta guztia merezi dute. Eta azkenik, bosgarren puntua ikerkuntzarena eta berrikuntzarena da. Geroago eta enpresa gehiago dabiltza osasun zientzian ikertzen, gure industria produktu berriak garatzen dabil, eta ezinbestekoa da, unibertsitateekin batera, potentzial horri guztiari etekina ateratzea".
