EAEren ekonomia %1,2 hazi zen 2014an

Euskal Autonomia Erkidegoko ekonomiaren BPG %1,2ko hazi da 2014an, eta gora egin dute jarduera-sektore nagusi guztiek, eraikuntzak izan ezik (-%3,0). Horrela jakinarazi du Eustat estatistika erakundeak.

Hego Euskal Herriaren eta Espainiaren BPG %1,4 hazi zen 2014an; azken urteotan izandako aldaera positibo bakarra da, 2010eko hazkunde txikia kontuan hartu gabe. INEren esanetan, hazkundea familien kontsumoaren hobekuntzari zor zaio gehienbat (Hego Euskal Herriaren eta Espainiaren BPGren %56 da etxeen kontsumoa).

Lehen sektorea hazi da gehien: %5,5

Euskadiren datuetara bueltatuz, Lehen Sektoreak aldakuntza positiboa izan du: %5,5; baita zerbitzuen sektoreak ere: %1,5. Industriako sektoreak ere izan du bilakaera positiboa (%1,0), aurreko urteetako tasa negatiboen joera hautsita. Hiru azpisektoreek parte hartu dute zerbitzuen sektorearen bilakaera positiboan.

Administrazio Publikoa, Hezkuntza eta Osasuna barne hartzen dituen adarrak erakutsi du dinamismo handien zerbitzuen sektorean: %2,2 hazi da. Ondoren Merkataritzaren, Ostalaritzaren eta Garraioaren sektorea dago, %1,6ko hazkundearekin. Gainerako zerbitzuek ere izan dute jarduera-mailaren hazkundea (%1,1).

Aurreko bilakaerak erantsita, %1,1eko hazkundea izan du Balio Erantsiak, eta positiboa ere izan da produktuen gaineko zerga garbien efektua 2014an (%1,7ko hazkundea).

Eskaria aztertuz gero, %1,1eko hazkundea du Barne Eskariak, eta horri gehitzen badiogu BPGren %1,2ko hazkundea, kanpoko saldoaren ekarpen positiboa dago 2014an. Esportazioek % 3,4 egin dute gora, eta % 3,2 inportazioek.

Barne Eskariaren 2014ko hazkunde positiboak Azken Kontsumoko Gastuaren %1,4ko hazkundea izan du oinarri, eta Etxebizitzetako azken kontsumoko gastua (%1,6) eta Administrazio Publikoen Azken Kontsumoko gastua (%0,9) igo dira; Kapital-eraketa Gordinak, aldiz, ez du hazkunderik izan (%0,0). Kapital-eraketa gordinean ere izan dira bi joera kontrajarri; batetik, Ekipo-ondasunei dagokienak tasa positiboak izan ditu (%2,2), eta bestetik, Gainerako Eraketa Gordinak, erakuntzari gehiago dagokionak, bilakaera negatiboa izan du (-%1,0).

Enplegua %0,3 hazi zen

Enpleguaren bilakaera, lanaldi osoko lanpostu baliokideetan neurtuta, positiboa izan da; %0,3ko batez besteko hazkunde estimatua izan da 2014an. Enpleguaren joerarik onena zerbitzuen sektorean izan da; hala, %1,1eko hazkundea izan da 2013ko batezbestekoarekin alderatuta. Halaber, Lehen sektorearen ere egon da enpleguaren hazkunde txiki bat (%0,2). Aitzitik, Industrian zein Eraikuntzan enplegua galdu da berriro; -%1,8 eta -%2,4, hurrenez hurren.

Lurralde Historikoen araberako BPGren bilakaera positiboa izan da hiru lurraldeetan. Araba eta Bizkaia %1,1 hazi dira, eta Gipuzkoa %1,4.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.