Txapelketa bertan behera uzteko arrazoietako bat hau da: Kirol Kontseilu Gorenak eta Enplegua eta Gizarte Segurantzaren Ministerioak egindako azterketa baten arabera erabaki dute kluben jarduerarekin lotura duten pertsona guztiak kontratua izan behar dutela eta gizarte segurantzara kotizatu. Horren arabera, monitoreak, entrenatzaileak, futbolariak... horiek guztiek kotizatu egin beharko lukete. "Erregulazio propio eta berezia garatzea eskatzen dugu, kirol ez profesionalarendako", dio oharrak. "Elkarte txikietan zaila izaten da jendea aurkitzea, beti berdinak gabiltza lanean. Hala, guri laguntzen ibiltzen direnei deklarazioa egin behar dutela esaten badiegu, ba, jendea ez da animatuko lanean jarraitzera", azaldu du Ramon Azkarate Mondrako zuzendaritzako kideak eta Gipuzkoako eta Euskal Federazioko kideak.
Horrelako neurriekin oinarrizko futbolean lanean diharduten elkarte asko desagertu egingo liratekeela uste du Azkaratek.
Kinielen dirua
Greba egiteko beste arrazoi bat kinielen diruari dagokiona da. "Kinielen dirua banatzeko orduan, futbol profesionala eta ez profesionalaren artean dagoen bereizketa handia da", dio oharrak. Azkaratek azaldu du orain arte kinielen %1a jasotzen zutela: "Federazioak banatzen du diru hori eta elkarte askorendako diru laguntza handia da. Estadioak, berdegunea, argiteria... konpondu izan da diru horrekin". Diru laguntza hori ere kentzea nahi dutelako protesta egingo dute.
Bestalde, txapelketa profesionaletako ikus-entzunezko eskubideen diru banaketa ere ez da justua Federazioarendako; eta, gainera, Espainiako Federazioak ezarri gura dituen hainbat arau atzera bota gura ditu Kirol Kontseilu Gorenak. Hori guztiagatik ere protesta egingo dute.
Esan bezala, aste bukaera honetako –22. jardunaldia– lehiak ez dituzte jokatuko. Hala ere, aurreko astean elurragatik atzeratutako batzuk egubakoitzean joka dezakete.
