Oñatiko eta Elgetako udalen aurka ere jo du Carlos Urkixok

UEMA, Udalerri Euskaldunen Mankomunitateko beste 7 udalen kontra jo du Carlos Urkixo, Espainiako Gobernuaren ordezkariak. Hala, Debagoienean, Bergara, Antzuola eta, orain, Oñati eta Elgetako udalak daude jomugan. UEMAk zapatuan Batzar Nagusia egin zuen Zumaian eta salatu zuten, eragingo duen kalte ekonomikoa ezeze, euskararen ofizialtasuna bera ere dabiltzala zalantzan jartzen.

Abenduan, besteak beste, Bergarako eta Antzuolakoekin egin zuen moduan, Carlos Urkixo, Espainiako Gobernuko ordezkariak Elgetako eta Oñatiko udalen aurkako helegiteak aurkeztu ditu, aktak euskaraz bidaltzeagatik. Maren Belastegi, UEMAko lehendakariak helegite berriak oso larritzat jo ditu eta salatu du Espainiako ordezkaria ekintza horien bitartez ezarri nahi duela "euskarak, erdara erabili ezean, ez duela balio ofizialik administrazio arteko harremanetarako". Belastegik, era berean, zalantzazko ikusten du justiziatik etor litekeen babesa bera ere, izan ere, "egungo euskararen legea oinarri hartuta", azaltzen du, ez dago "epaitegiek arrazoia emango diguten ziurtasunik".

Hala eta guztiz ere, Antzuola, Oñati, Bergara eta Elgetako Udalek aktak euskaraz bidaltzen jarraituko dutela azaldu zuten zapatuan, gainerako beste 7 udalekin batera. Erasoalditzat jo duten hori izan zen Batzar Nagusiko hizpidea. Azken asteetan 13 udalek jaso dituzte Espainiako Gobernu Ordezariaren helegiteak aktak euskaraz bidaltzeagatik. Berriz ere, Jaurlaritzari babesa eskatu diote, hari baitagokio, UEMAren esanetan, euskararen ofizialtasuna defendatzea eta, honekin bat, salatu dute batzartzeko egindako eskarien erantzunik ez dutela jaso.

"Ataka zailean" aurkitzen direla azaldu zuten zapatuan Zumaian, "urte hauetan guztietan egindako bidean atzera egin beharra larria"  izateaz gain, ekonomikoki ere gastu judizialei aurre egin beharko diete udalek eta helegiteek aurrera eginez gero, euskarazko dokumentuak gaztelaniara itzuli beharrak gastu ekonomiko erantsi bat ekarriko diela salatu baitzuten.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.