Goiena Komunikazio Taldea hasieratik izan du bidelagun proiektuak. Aholkua eta babesa emanik, Iban Arantzabal zuzendari nagusiak hartu zuen hitza zapatuko aurkezpenean Araban euskarazko astekari batek zelako beharra zuen azpimarratuz eta harpidedunak lortzen eta lortzen jarraitzeko deia egin zuen. Goienarekin batera, Berria Taldea ere ibili da akuilu lan horretan. Hala, Iban Arregi Berria Taldeko kontseilari ordezkariak nabarmendu zuen hutsune bat betetzera datorrela Alea.
Banaketa masiboa
Montehermoso jauregiko sarrerako patioa euskaltzale eta euskalgintzako kidez bete zen zapatu iluntzean. Astekariaren lehen zenbakia urtarrilaren 19an kaleratuko dute eta bien bitartean harpidetza kanpainarekin jarraituko dute. Hain zuzen, zapatuko 0 ale hori etzi, Euskararen Nazioarteko Egunean, Gasteiz eta Araba osotik banaketa masiboan zabalduko dute. Horretara batzeko deia egin zuten, halaber, zapatuan. 65.000 Alea gura dituzte banatu.