Urriko lehen aste bukaeran inauguratu zuten Espaloia kafe antzokiko kultura etapa berria Oihulari Klown taldeko kideek. Muñozek eta imazek gaur eman dute proiektua uzteko erabakiaren berri. Proiektuan "gogo, denbora eta dirua" inbertitu dutela adierazi dute ohar bidez. "Proiektu liluragarria iruditzen zitzaigun, eta gaur egun oraindik ere iruditzen zaigu".
Azaldu dute proiektua lagatzeko arrazoien artean "familiako egoera eta egoera pertsonal oso larriak" daudela. "Ekimenarekin aurrera egiten eragozten digute, momentuz behintzat. izan ere, aretoaren etapa berri honek, ezinbestean, energiaz beteriko lantaldea eskatzen du, besteak beste, aurkezten diren jasangarritasun erronkei aurre egiteko. Zoritxarrez guk, uneotan, ezin dugu ez emozionalki ez ekonomikoki".
Aretoaren zein Elgetako udalaren inguruan sor daitezkeen zurrumurruak ekidin nahi dituztela ere esan dute Muñozek eta Imazek oharrean. "Aretotik zein Udaletik aurrera egiteko animoak eta babesa jaso ditugu uneoro", esan dute. "Onena opa diegu lekukoa hartuko dutenei".