Hasteko, dekoratu berria estreinatuko da gaurko saioan. Denok Zuzeneko Komunikazioa enpresak diseinatu eta muntatu du platoko dekoratu berria, Lanbide Hastapeneko ikasleen laguntzarekin.
Gainera, kulturaren inguruko tarte berri bat ere estreinatuko da gaurko saioan Mondragon Unibertsitateak eta Goiena Komunikazio Taldeak kolaborazioan eskainiko dutena. Asteburuan MUn ematen hasi diren Aditu Tituluaren jarraipena egingo da tarte horretan hilero eta horren kronika egingo du Jon Berezibar Goienako kazetariak telebistan.
Bailarako eraikinak ezagutuz
Bestalde, martitzenero Debagoieneko eraikinak ezagutu ahal izango dira aurrerantzean Mireia Bikuña kazetariaren eskutik. Orain arte tarte horretan, bailarako auzoak ezagutzeko aukera izan da, baina horri lekukoa hartuko dio berriak. Eraikinen historia eta bitxikeriak ezagutu ahal izango dira, besteak beste.
Sare sozialei buruz
Eguaztenetan, berriz, orain arte egindako udako bidaiei buruzko tarteak atseden hartuko du eta MUko irakasle Amaia Pavon itzuliko da sare sozialei buruz hitz egitera.
