"Zailena izaten da ondo antolatuta egotea, hau da, kudeaketa taldea txukun ibiltzea garrantzitsua da. Eta bestetik, parte hartzen dutenek argi izan behar dute beti egongo dela norbait agintzen eta hark esandakoari kasu egin behar zaio. Gauzak egin behar dira azkar eta ondo, ahal izanez gero", azaldu zuen Santi Ugarte koordinatzaileak.
Emergentzia zerbitzuak abisua jasotzen duen unetik lau edo bost ordu pasa daitezke gutxienez espeleosorosleak ezbeharraren lekura iristeko. "Aurretik kudeaketa taldea jarri behar izaten da martxan eta horiek erabakitzen dute zein material eraman, zenbat jende behar den laguntzeko edo zein mediku talde joan behar den". Simulaziorako beste behin Gesaltza aukeratu zuten, koba "zabal" eta "segurua". Halako ezbeharren benetako kasuak, baina, "zorionez oso gutxi" egoten dira hemen inguruan, Ugarteren esanetan.
