Ehunka euskaltzale batu dira gaur Derion, herriko Tximintx euskara elkarteak eta Euskaltzaleen Topaguneak antolatutako Topa Egunean. Hirugarren edizioa izan du gaur euskaltzaleen mugimenduak antolatzen duen festak eta urtero moduan, ospakizuna eta esperientzien trukatzea uztartu ditu egunak.
Ein daigun topa euskaltzaleon alde! lelopean egin dute festa eta "euskaraz bizi gura duen komunitatearen garapenerako euskaltzaleen ekarpena inoiz baino beharrezkoagoa" dela esan dute Topaguneko ordezkariek, "euskararen normalizazioan gizarte mugimenduaren momentua" dela azpimarratuz.
Euskaltzaleen ametsak, etorkizunera begira
Ametsekin ekin diote egunari euskaltzaleek, 15 urte barruko euskararen egoeraren inguruko hitzak ereiten, hain zuzen. Euskara elkarte desberdinetako kideek 15 urte barru euskararen egoera euren herrietan nolakoa izango den irudikatu eta lurpean gorde dituzte ametsok, 2029 urtean ereindakoaren fruituak jasotzeko asmoarekin.
Esperientziak eta jaia
Esperientzien elkartrukea eta jaia uztartu dira goiz guztian zehar. Bederatzi egitasmoren aurkezpena egin dute euskara elkarteetako ordezkariek eta askotarikoak izan dira bertaratutakoek ezagutu dituzten esperientziak; kultur egitasmoak, aisialdi arlokoak, familia transmisiokoak edo hedabideen arlokoak.