Zabalik dago Enpresarean azokan parte hartzeko izena emateko epea

Euskaraz lan egin nahi duten enpresen arteko harreman eta elkarlana sustatzeko asmoarekin, urriaren 23an egingo dute Donostiann Enpresarean azoka.

Urriaren 23an egingo dute Donostiako Kursaalen Enpresarean azokaren bigarren edizioa. Bai Euskarari Ziurtagiriaren Elkartea da jardunaldiaren antolatzailea, Gipuzkoako Foru Aldundiarekin,Donostiako Udalarekin eta Laboral Kutxarekin batera. Helburua da euskaraz lan egin nahi duten enpresen arteko harremana eta elkarlana sustatzea.

"Bai Euskarari Ziurtagiriaren Elkartean eskuartean dugun Enpresarean proiektuaren zati bat da azoka. Hor dago www.enpresarean.org plataforma, enpresa eta profesional euskaldunak batzen dituena. Askotariko ekimenen bidez, urtean behin behintzat, sare hori osatzen dutenei aurrez aurre berba egiteko aukera eman nahi diegu, eta hor kokatzen da azoka", dio Elkarteko zuzendari Roberto Gutierrezek. Modu horretan, enpresen arteko elkarlana bideratu eta proiektu enpresarial berrien sorrerari bide eman gura diote.

Euren burua aurkezteko aukera

Euskaraz lan egiten duten enpresei; euskararen inguruko produktuak eta zerbitzuak eskaintzen dituztenei eta euskarazko ekimen enpresarial bat abiatu gura dutenei dago zuzenduta azoka. Gutierrezen hitzetan, Elkartearen helburuetan dago alor sozioekonomikoaren euskalduntzean eragitea: "Proiektu honekin, zuzenean ari gara eragiten euskararen presentzia gero eta handiagoa izan dadin".

Bigarren edizio honetan, Euskal Herriko enpresek etorkizunean dituzten erronkak izango dira azokaren ardatz. Horretarako, mahai-inguruak, solasaldiak eta tailerrak  egongo dira, eta berauetan, askotariko enpresa eta erakundetako ordezkariek euren esperientziak partekatuko dituzte. Gai nagusiari, hau da, etorkizuneko erronkei, ikuspuntu ezberdinetatik helduko diote. Hala, besteak beste, merkataritza elektronikoaz egingo dute berba; baita formazioan dauden erronken inguruan ere.

Gura duten enpresek, gainera, euren negozioen berri emateko aukera ere izango dute. "Aurkezpen laburrak izango dira, hiru minutukoak, eta enpresek euren ideien berri emateko edo elkarlana bilatzeko erabiltzea gura dugu", dio Gutierrezek.  Enpresen arteko hartu-emanak sustatzeko, bazkaria egoteaz gain, areto nagusitik aparte egongo den beste areto bat ere atonduko dute. "Horrela, enpresetako ordezkariek, hala gura badute, jardunaldian zehar ere izango dute hitz egiteko txokoa", azaltzen du elkarteko zuzendariak.

Izena emateko, bi epe

Izena emateko, bi epe daude: azokan euren negozioen berri eman gura duten enpresek urriaren 10a dute izena emateko azken eguna; gainerakoek, urriaren 17a. Izena emateko, www.enpresarean.org webgunean dagoen galdetegia bete behar da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.