"Atzo arratsaldera arte kinieletan zegoen Loreak, eta pena apur bat eman digu saririk ez irabazteak; baina uste dut pelikula indartuta irten dela", dio Aitor Arregi oñatiarrak, pelikulan gidoilari eta ekoizle lanak egin dituenak, sari barik geratzearen inguruan. Zinemaldian bizitakoa, baina, maila askotan ikusgarria izan dela gaineratzen du, eta balantzea, ''oso ondotik gorakoa" dela dio.
Urriaren 31an helduko da Euskal Herriko eta Espainiako zinema aretoetara pelikula, eta A contracorriente izango da banatzailea. "Berme bat da eurek estreinatzea, ez dute-eta edozein pelikula hartzen. Intocable, esaterako, eurek estreinatu zuten".
Zinema jaialdiak dira pelikulak hartuko duen bigarren bidea. Gaur bertan Zurichera abiatu dira Loreak-en zuzendariak pelikula hango jaialdian aurkezteko, eta laster Londreskoan ere egongo dira. "Duen profilagatik, badirudi Loreak-ek jaialdietan ibilbide polita izan dezakeela. Horri garrantzia ematen diogu, pelikula ezagutarazteko eta banatzaileak lortzeko balio duelako", dio Arregik. Loreak-en bidea, beraz, hasi besterik ez da egin.