Fagorrengatik sei eskaintza, momentuz

Fagor Etxetresnen Garagartzako lantegia.

Zifra dantza eta data dantza. Horixe da Fagor erosteko eskaintzen gainean atzo eta gaur komunikabideetan ikusten gabiltzana. Gaurko (martitzena) datua da sei direla Fagorrengatik jasotako eskaintzak. Edozelan ere, Fagorreko iturriek Goienari adierazitakoaren arabera, informazio guztia dago filtrazioetan oinarrituta. Ez da ofiziala.

Eta gaineratutakoaren erabera, datozen egunotan jakinaraziko dituzte zeintzuk diren jasotako eskaintza ofizialak.

Estatukoak zein nazioartekoak

Kontuak kontu, argitaratu diren filtrazioen arabera, Fagor Etxetresnak erosteko estatuko zein nazioarteko enpresen eskaintzak jaso ditu Pedro Malagon konkurtso epaileak, honako hauek: Cevital (Aljeria), Cata-CNA (Katalunia), Amica Wronky (Polonia), Taurus (Katalunia), Ecomac (Txile) eta Ariston Thermo (Italia).

Dena dela, Fagorreko iturriek esandakoaren arabera, behin eskaintza guztiak jasota, konkurtso epaileak beste astebete edo hamar eguneko epea emango die eskaintzaileei egindako eskaintzak hobetzeko.

Hain justu ere, hori dela eta atzeratuko da uztailaren amaierara arte Malagon epailearen erabakiaren jakinarazpena, Fagor zeinek erosiko duenaren gainekoa.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.