Eta itxaronaldian lagundu du, nola ez, animazioak: Arrasateko kilometroetan, adibidez, Txorbela otxotea kantuan, dultzaineroak, trikitilariak... San Prudentzion ere txistulariak.
Giza katearen hasiera ordua gerturatzen doan heinean, eskuz esku ilara osatzen doaz herritarrak. Zintzo daude, esaterako, Arrasate herri barruko kate-begiak, bakoitza dagokion tokian ipinita. Eta familiak, bitartean, Monterronen, zain.
San Prudentziotik, baina, lasaiago zebiltzala kontatu digute 11:15ean: autobus mordoa heltzen zebilen ordu horretan oraindik, eta jendea hamaiketkoa egiten zebilen, patxadaz, elkartetik ermitara arteko tartean. Umeak, bien bitartean, jolasean, gustura.
Goiztiar ibili da jendea eta zenbait momentutan lanak izan dituzte hainbatek kafe bat hartzeko ere, Arrasaten, gutxienez.
