Euskal Herriak eta bertakoek utzitako aztarna hori bueltatzeko egindako lanak ikusgai egongo dira Laino Skateparkean, "hemen urte hauetan egin ditudan tatuaje ugariez gain, erakusketa hau nire arima hemen lagatzeko modu bat da", dio Uruguayko artistak. Hamaika skate taula eta snowbordeko taula hauekin agurtuko da tatuajegilea laster Bartzelonara joango da-eta, "erakusketa hau gero arte esateko modu bat da".
Polinesiako artea
Bonache tatuajegilea den heinean, ongi ezagutzen dituen Polinesiako tribuen marrazkietan oinarritu ditu lanok baina bere ukitua eman die, "Polinesiako marrazkiak gogora ekarri arren nik kolorea ere jarri diet". Kolorea gainera ez du edozein modutan aukeratu, horiak, moreak... ilunabarra gogora ekartzen dituen koloreak erabili ditu. Artelan bihurtu dituen taulak, gainera, autoek izaten duten berniz batekin estali dituenez, horrek ere, ukitu berezia ematen dio bere lanei.
Irekiera festa berezia
Erakusketa irail erdi arte ikusgai egongo den arren, egubakoitzeko irekierara jende asko gerturatu zen. Mokadutxo eta garagardo artean, jendeak artistaren eskutik lanak ikusteko aukera paregabea izan zuen. Luxu hau gutxi balitz bezala, bertaratu zirenen artean tatuaje polinesiar bat ere zozketatu zuten. Opari horretan ere Bonachek bere aztarna utziko du.
Hala ere, udazken partean, hilabetez berriro etorriko da gurera.