"Euskararen normalizazio prozesuaren aurkako estatuen esku-hartzeak ez dira berriak, baina azkenaldian aspaldiko erarik agerikoenean ari dira bi estatuak, Espainia eta Frantzia, inolako mozorrorik gabe. Espainiako estatuak LOMCE legea onartu du euskarazko murgiltze ereduaren hazkundea oztopatu nahian eta Frantziakoak ere ikastolen aurka egin du, murgiltze ereduaren aurka, 1850eko Falloux legeaz baliatuz", adierazi dute Kontseilutik. Horri gehitu diote Espainiako ordezkariak Gipuzkoako Foru Aldundiaren eta beste 46 udalen aurka egin duela azken hilabeteotan, hizkuntza-politikari lotutako hainbat arlotan. Eskoriatzako Udalari, esate baterako, indarrean dituen euskara planak bidaltzeko eskatu dio, baita hizkuntza-irizpideekin lotutako edozein erabaki jakinarazteko agindua eman ere.
Neurrien erreakzio gisa, zera azaldu du Kontseiluko idazkari nagusiak: "Udalek euskararen normalizazioan aurrera egiteko hartu dituzten neurriak herritarron eskubideak bermatzeko urratsak dira eta zentzu horretan herritarroi ere badagokigu neurri horiek babestu eta kanpo esku-hartzea salatzea. Horretarako, Espainiako Gobernuak EAEn duen ordezkari Carlos Urkijoren mehatxu eta salaketak jaso dituzten udalerrietan elkarretaratzeak egingo ditugu apirilaren 9an".
Kontzentrazioak herrietako udaletxe aurreko plazetan egingo dira Estatuen esku-hartzea gelditu lelopean eta lelo hori irudikatzeko eskuak koloretako margoekin bustiko dituzte, gelditzeko keinu gisa.