Golden Apple Quartet Elgetan ikusteko sarrerak salgai jarri dituzte

Eneko Azkarate 2014ko mar. 28a, 10:06
Golden Apple Quartet apirilaren 5ean Elgetako Espaloian ikusteko sarrerak salgai daude dagoeneko. Espaloia antzokiaren webgunean eta Kluturalive webgunean eros daitezke; horretaz gain, espektakulua antolatzen duen Pikupe produkzioen egoitzan, Bergarako Artekalean, ere bai. 15 eurotan jarri dituzte salgai; Goibeko euskara elkarteko bazkide direnendako, 10 eurotan.

Golden Apple Quartet donostiarrek 25 urte bete dituzte eta ikuskizun berria estreinatu dute hori ospatzeko. Arrakastaz aurkezten dihardute antzokirik antzoki. Bazen behin… Golden da ikuskizunaren izenburua.

Espektakulu musikalak egiten horrenbeste urte daroatzan laukotearen helburu nagusi eta bakarra da "ikus-entzuleak ondo pasa dezan" saiatzea, haien berbetan. Donostiazko Jazzaldian hasi ziren 1990ean eta orain urteurrena ospatzera datoz Elgetara. Aurtengo udan ere Jazzaldian izango dira.

Musika eta umorea lotzen direnean, laukote honekin gogoratzea ezinbestekoa da. A capella kantatzeko modu horrek ere berezi egin ditu-eta.

Telebistan sarri ikus ahal izan ditugu, hainbat plato pasatu baitituzte laukote moduan. Hala ere, antzeztokia da Golden Apple Quartet-ek berezko duen esparrua.

Ipuin baten formatua

Halaxe diote ikuskizun berriaren gainean: "Ikuskizun musikal honek ipuin baten formatua hartzen du; off-eko ahots batek taldekideekin batera aritzen den bitartean, azken urteotan eszenatoki gainean bizi izandakoa kontatzen du. Bertan ikusleak taldeak dituen saiorik ezagunenak (Telebistari esker) edota beste batzuk guztiz berriak ikus ditzake. Honetaz gain, gidoi batek ongi lotuta dituen sketch-ak antzeztuz eta besaulki-patioa jai bihurtuz lau lagun hauek izango ditugu".

Datorren barikuan, apirilaren 5ean, eskainiko dute ikuskizuna, 22:30ean hasita, esan bezala, Elgetako Espaloian.

Sarrerak erosteko:

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak