Normaltasuna Debagoieneko errepideetan

Gogotik bota du euria bart, eta zenbait tokitan elurra ere bai. Denboralea dela-eta, hain justu, arretaz gidatzea eskatzen da, baina Debagoienari dagokionez, garbi daude errepide sare nagusia nahiz mendateak. Elgetatik kontatu digute, esaterako, euria eten gabe ari duela eta txingorra ere botatzen duela tarteka, baina elurrik ez duela egin eta inguruko tontorretan ere ez dela halakorik ikusten.

Errepideen eta mendateen egoeraren gaineko informazioa trafikoa.net wegbgunean aurkituko duzue.

Datozen orduetan izango dugun giroari dagokionez, Euskalmeten iragarpenaren arabera, zerua estalita egongo da. Egunean zehar euria egingo du, asko eta eten barik zenbait tokitan, eta trumoi-ekaitza eta txingorra izateko probabilitatea handia izango da. Gauean atertzera egingo du. Goizaldean eta azken orduetan elur-kota 600-800 metrora egongo da, eta egunaren erdiko orduetan 800-1.000 metrora. Ipar-mendebaldeko haizea ibiliko da, eta tenperaturak jaitsi egingo dira: hiru eta zortzi gradu artean ibiliko dira. Mendi inguruetan izotz txikia egingo du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.