Elosuako bidean kateak edo neguko erruberak behar direla zioen goizean trafikoa.net webguneak, baina Elosuatik bertatik esan digute ezetz, elur bustia egin duela, baina ez besterik.
Giro nahasiarekin esnatu da domeka goiza: eguzki izpiak orain eta euri zaparradak gero.
Iragarpena
Euskalmet-en iragarpenaren arabera, gisa horretan igaroko da goiza, eta arratsaldean hobetzera egingo du: atertu eta egunaren amaieran hodeiak gutxitu egingo dira. Elur-kota 700 metrora igoko da eguerdi partean eta 800-1.000ra arratsaldean. Haizeak ipar-mendebaldetik joko du eta tenperatura maximoak gutxi jaitsiko dira.
Astelehen goizaldean zerua hodei gutxirekin egongo da, baina goizean zehar hodeiak ugaritzen joango dira eta oso hodeitsu geratuko da; eguerditik aurrera, euria egingo du. Elur-kota 1.000-1.200 metrotan geratuko da egunaren amaieran. Haizeak hego-mendebaldetik joko du hasieran, baina mendebaldera eta ipar-mendebaldera aldatuko da arratsaldean. Tenperaturak ez dira ia aldatuko. Barnealdean izotz txikia egingo du.