Alde positiboan, lan-atxikipenengatik eta BEZarengatik "nabarmen" gehiago batu du Ogasunak; alde negatiboan, sozietateen gaineko zergarengatik lehen baino askoz gehiago itzuli behar izan du. "Hala ere, itzulketak datozen hilabeteetan egonkortzea espero da", esan du Ogasunak.
Zuzeneko zergen bilketa metatua %0,5 jaitsi da, batez ere Sozietate Zergaren eraginez. Iaz kanpainako itzulketen eskaerak handitu egin ziren. Itzulketa hauek urte bukaeran eta hurrengo urteko hasieran egiten direnez, 2014ko otsailera arte sozietate zergaren itzulketak 14 milioi handitu dira.
PFEZek %3,3 egin du gora
Aldiz, zergadun arruntok eta langileok gehiago ekarri diote Gipuzkoako diru-kutxari: PFEZek gora egin du (%3,3), lan etekinen atxikipenen hazkundeari (%4,1) esker. Gainera. hazkunde hori hirugarren hilabetez errepikatu da jarraian.
Zeharkako zergek %7,3 egin dute gora. BEZen bilketa garbia %11,2 hazi da. 17,7 milioi euro gehiago bildu dira oro har BEZean, sarrerak (28,2 milioi) eta itzulketak (10,5 milioi) hazi izanaren ondorioz.
"Joera batzuk" nabarmentzen ditu Foru Ogasunak: sarrera gordinak %5,9 handitu dira, nahiz eta urte hasierako itzulketa handiek zerga-bilketa pilatua pixka bat gutxiago igotzea ekarri duten (%2,1 igo da).