Oronaren 'berrikuntzaren hiria' izango dena bisitatu du Arantza Tapiak

Arantza Tapia, Oronaren instalazio berrietan.
Eusko Jaurlaritzako Ekonomiaren Garapen eta Lehiakortasuneko sailburu Arantza Tapiak Oronak dituen instalazio berriak bisitatu zituen eguazten arratsaldean, Oronako zuzendari nagusi eta Mondragon Korporazioko presidenteorde Javier Mutuberriak gonbidatuta, hurrengo hilabeteetarako aurreikusita dagoen inaugurazioaren aurretik. Miramongo teknologia parkean egongo da, eta Orona IDeO-innovation city deituko da.

Tapiarekin batera, Industriako sailburuorde Juan Ignacio García de Motiloa eta Teknologia, Berrikuntza eta Lehiakortasuneko sailburuorde Estibaliz Hernáez izan ziren. Oronako arduradunekin bildu ziren, eta horiek Orona Ideo proiektua azaldu zieten.

Orona IDeO – innovation city izena izango du hiri-mugikortasun jasangarri eta autonomo baterako Europako lehen ikerketa- eta berrikuntza-zentroak. 70 milioi euroko inbertsioa izan du, eta dagoeneko eraikitzen ari dira. 40.000 metro koadroko azaleran eraikiko diren eraikinetan, bada, etorkizuneko irisgarritasun- eta mugikortasun-sistemak diseinatuko dira.

Arantza Tapia sailburuak Oronak, erakunde publikoen laguntzarekin, egindako apustua nabarmendu du; izan ere, "balio handiagoa emango dio Miramongo teknologia-parkeari, I+G+b-ren funtsezko aktoreak –hots, enpresak, I+G+b-ko teknologia-zentroak eta unibertsitateak– bateratzen dituen ingurune fisiko bat sortuko baitu", arduradunen esanetan.

Emaitza onak

Mondragon Korporazioko Industria saileko kidea da Orona. Aurten, 50 urte egiten ditu. 2012ko ekitaldian, 83,4 milioiko irabaziak izan zituen, eta Brasilgo Grupo AMG Elevadores erosi zuen. Krisi garaian ere, salmentak handitu ditu: 2012an, aurreko urtean baino %2,3 gehiago, denetara 569,1 milioi.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.