Arrasateko euskara elkarteak laugarrenez antolatu du Euskarazko Palindromo Lehiaketa, eta beste behin ere parte hartzearekin pozik azaldu dira. Hala eman digu aditzera Maite Agirre dinamizatzaileak: "Guztira 70 lan jaso ditugu eta 13 izan dira parte hartzaileak. Euskal Herriko toki ugaritatik bidali dituzte lanak, eta aurten, Debagoieneko herrietako parte hartzea nabarmenduko genuke".
Hori horrela, ez dute lan makala izan Markos Gimeno palindromogileak, Arrasateko Udal Euskaltegiko irakasle taldeak eta Debagoieneko AEK euskaltegiko irakasle taldeak osatutako epaimahaiak.
Azkenean, Nafarroa aldera joan da sari nagusia, eta Migel Angel Barreroren Auzi aurrean, amaren zain, iaz neramana: errua, izua izan da 2014ko palindromorik onena. Arrasateko lanik onenaren kasuan, Blanka Jauregik eginiko Nazi alegre izan ala nazi ergela izan saritu du epaimahaiak.