Aretxabaletan, Lausitta kalean topatu ditugu kintoak kantuan, gaur goizean; 1995 urtean jaiotako 35 neska-mutil inguru irten dira aurten. Kinto guztiak batera hasi dira abesten baina, egunak aurrera egin ahala, taldetan banatu behar izan dira, herri osora iritsi ahal izateko.
Eskoriatzan ere taldeka banatu dira hasieratik. Batzuk Olaeta eta Aranburuzabala aldetik ibili dira eskean, beste batzuk erdialdetik, eta hirugarren talde bat Intxaurtxuetan. Denera, 1996an jaiotako 24 gazte inguru.
Saio gehiago
Santa Ageda bueltan egindako ospakizunak, dena dela, ez dira gaur amaituko. Aretxabaletarrak, Aratusteak bitartean, domeketan elkartuko dira plazan, 19:00etan; aurten bost domeka dituzte aurretik. Eta ohiturari jarraituz, Aratuste-martitzenean, txino-dantzarekin irtengo dira.
Eskoriatzarrak, berriz, lehenengo domekan baino ez dira ostera ere batuko dantza egiteko. Dantza egiteko ez, baina azken urteotako ohiturari jarraituz, Kinttada Eguna egingo dute herriko askotariko adinetako kintoek; zapatuan izango da hori.
