'Erbesteko' txantxikuen afaria

Juan Carlos Pascual, semeekin, Leintze elkarteko sukaldean.
Jaioterriarekin muga egiten duen herrian bizi daiteke norbera, etxetik ordu laurdenera autoz, eta hala ere herri mina sentitu. Horren erakusgarri da herritik kanpo bizi diren oñatiar batzuek izan duten ekimena: Arrasaten eta Aretxabaletan bizi diren oñatiarrendako afaria antolatu dute.

Martxoaren 21erako, egubakoitza, egin dute deialdia, Arrasateko Erdiko Kaleko Leintze elkarte gastronomikoan. Izenematea zabalik dago martxoaren 19era arte, honako telefono zenbakian: 696 77 73 97.

Lehenengo aldiz antolatzen dute horrelako zerbait, eta ez dakite zer nolako erantzuna izango duten. Juan Carlos Pascual oñatiarra da antolatzaileetako bat, eta "dozena bat" lagun inguru azaltzea aurreikusten dute. Azken finean, jende asko batzea baino garrantzitsuagoa izango da batzen direnek ondo pasatzea, Oñatiko bizipenen gainean kontu kontari eta oroitzapenak trukatzen. Juan Carlos Pascual Pascu-k konfirmatzen digunez, "herri mina sentitzen da, bai horixe!" Eta honakoa gaineratzen du: "Arrasaten oso integratuta nagoen arren, parranda egitera oñatiarrok askotan Oñatira joaten gara".

Hurrengo, jatetxean 

Bi lagunen artean izan zuten burutazioa eta, Debagoien osoko oñatiar erbesteratuak deitzea aukera bat izan zen arren, afaria Pascu-k gertatu behar du eta oso lagun-talde handia ere ez zaie komeni. "Asko etortzen badira, bigarren aldirako jatetxeren baten egingo dugu", esaten du antolatzaileak. 

Ez daukate Arrasaten eta Aretxabaletan bizi diren oñatiarren zentsurik, ez dakite zenbat dauden. Arrasaten, behintzat, banaka batzuk badira: "Bistaz ezagutzen ditut hamabost bat-edo; antzeko adinekoak gara eta Oñatin ere elkarrekin ikastolan, futbolean, musikan… ibili izandakoak gara asko".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.