Atzo, barikua, aurkeztu zuten Aretxabaletako Udalak, Mondragon Unibertsitateak eta Arteman Komunikazio enpresak Euspot lehiaketaren 2014ko edizioa. Aurkezpenean azaldu zutenez, aurtengo helburu nagusia lehiaketa kontsolidatzea eta euskararen panoraman erreferentziazkoa bilakatzea da. Gainera, gazteen partehartzea sustatzeko nahia ere baduela azpimarratu zuten: asmoa da gazteen sormena bultzatzea, ilusioak piztuz.
Hirugarren edizio honetako gaia Pintxo potea eta euskara aukeratu dute. Spota edozein formatutan grabatu ahal izango da. Post-produkzioa ere nahi den programarekin egin ahal izango da. Dena den, hobetsi egingo dira HD formatuan grabatutako eta muntatutako lanak. Iraupenari dagokionez, 20-30 segundo arteko spota izan beharko da.
Oinarri sendoa, izaera irekia
Lehiaketa irekia da, edozeinek har dezake parte, debagoiendarrek zein Euskal Herri osokoek, eta hala nahi izanez gero, baldintzak betetzen dituen gure mugez haratagoko edozeinek ere bai. Hain zuzen, Euskal Herrian bultzatu nahi dute parte-hartzea, beti ere, Debagoienean oinarri sendoak jarrita. Horretarako, Mondragon Unibertsitateak bere ikasketa kurrikulumean spoten gaineko ikasgaia sartu du eta Arizmendi ikastolako zein Kurtzebarri eskolako Derrigorrezko Bigarren Hezkuntzako ikasleek lehiaketan parte hartu ahal izango dute. Unibertsitatearentzat lehiaketa bera eta ikasleen parte-hartzea epe luzerako inbertsioa da. Inbertsio baita ere hizkuntzaren erabilerari dagokionez.
Hain zuzen, Aretxabaletako Udalak, sustatzaile nagusiak, Euspot lehiaketaren aldeko apustua egin nahi izan du aurten ere, euskara bizitzako alor guztietara hedatzeko, eta arlo horretan egiten ari diren lana goraipatu nahi izan dute. Ildo horretatik, antolatzaileek bereziki nabarmendu zuten, aurten ere 16 urtetik gorakoek aukera izango dutela lehiaketan parte-hartzeko, eta horretarako harremanak sustatu direla zenbait ikastola eta eskolarekin.
2.250 euro saritan
Lanak maiatzaren 9a baino lehen aurkeztu beharko dira www.euspot.eu webgunean eta sari banaketa ekitaldia maiatzaren 15ean egingo da Aretxabaletako Arkupe kultura etxeko Zaraia aretoan. Guztira, aurten ere, 2.250 euro banatuko ditu Euspot lehiaketak saritan: spotik onenak 1.000 euro jasoko ditu; MUko ikasleen spotik onenak, 500 euro; Ikusleen saria 500 eurokoa izango da; eta Gazteen saria –18 urte beherakoak–, 250 eurokoa.
Lehiaketaren oinarriak kontsultatzeko: http://euspot.eu/lehiaketaren-oinarriak/