Alderdi sozialistak prentsa ohar bidez jakinarazi duenez, PPk ezarri gura duen abortuaren legearen aurkako mozioa erregistratu dute Arrasaten, Bergaran eta Eskoriatzan. Mozioa aurkeztu dute Debagoieneko udalek Rajoiren Gobernuari eska diezaioten legearen erreforma "berehala" bertan behera uzteko. Aurreproiektua gelditzeko euren eskuetan dagoen "guztia" egiten ari direla ekarri du gogora Arrasateko bozeramaile Aritz Arrietak.
Arrietaren ustez, abortuaren legearen erreforma emakumeen erabakitzeko eskubidearen aurkako "eraso" bat da. Gainera, egun indarrean dagoen legea PSOEren gobernuak onartutakoa dela gogoratu du sozialista arrasatearrak: "Egungo legeak emakumeei modu librean erabakitzeko aukera ematen die eta askatasun horrek ahalbidetu du, gainera, azken urteetan abortu gutxiago egotea".
1980eko hamarkadara itzultzea
Alderdi popularrak ezarri gura duen legearekin 1980eko hamarkadara itzuliko garela uste du Arrietak: "Erosteko ahalmena dutenak Frantzia edo Ingalaterrara joango dira eta gainerakoek klandestinitatera joko dute". Era berean, gizartearen gaitzespena eta alderdi popularrean bertan iritzi ezberdinak sortu dituela gogoratu du Arrietak.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak