Ahalik eta egitarau zabal eta parte hartzaileena osatzen saiatu gara Elgetako eragile eta norbanakoek.
Elgetako Korrika Batzordearen izenean, antolatutako ekimenetara gerturatu eta bertsoak entzun zein bota dituzuenoi, afaria eta bazkaria prestatu duzuenoi, gerri buelta mugitu edota eztarriak urratu artean abestu duzuenoi… eskerrik asko, euskalakari guztioi!
Baita eguen goizaldean errepidera irten eta iluntasuna zuen laster-pausoez argitzearren ere. Mila esker, zuen parte hartze eta irriaz euskara hauspotzeagatik.
Hala ere, ez ahaztu egunotan egindakoa ez dela nahikoa eta gure konpromisoa beharrezkoa dela; euskaraz bizitzeko elgetar guztion konpromisoa. Hortaz, ez dagigun datorren ediziora arte itxaron, eta egin dagigun milaka berbetako-kilometro egunero, euskaraz!
-------------------------
Ane Elorza
(Elgetako Korrika Batzordearen izenean)
Elgeta
