Venezuelan atxilo zegoen Asier Guridi oñatiarra aske dago, eta asilo politikoa lortzeko lanean ari dira abokatuak

Julen Iriondo 2013ko abe. 7a, 12:46

Espainiak egina du Asier Guridiren kontrako estradizio eskaria, ETAko kidea izatea egotzita, besteak beste. Venezuelak eta Espainiak badute estradizioetarako hitzarmena, baina hitzarmen horretan bada klausula bat estradizioa eragozten duena "arrazoi politikoak" tartean badaude, eta hori argudiatzen dute abokatuek, Espainiaratu ez dezaten eskatzeko. Asier bera ondo dagoela adierazi dute bere gertukoek.

Abokatua, familia eta gertukoak ari dira lanean Venezuelari erakusteko Asier Guridi bere "militantzia politikoagatik" dagoela herrialde hartan eta dagoen egoeran. Euskal Herritik horren gaineko hainbat dokumentazio bidali dutela adierazi diote Goienari Guridiren gertukoek.

Asier Guridi irailaren 20an atxilotu zuten Venezuelan. Nortasun faltsuarekin bizi zen herrialde hartan, eta orain asilo politikoa eta venezuelar naziotasuna lortzeko lanean dihardute. Venezuelan emaztea eta semea ditu oñatiarrak, eta horiekiko bere lotura erregularizatu nahian –bere benetako nortasunaren arabera– ere badihardute, naziotasuna lortu ahal izateko.

Guridik 15 eguneko gose greba ere egin zuen bere atxilo-aldian, preso zegoela zituen bizi-baldintzengatik kexu. Bere gertukoek adierazi dute berriki izan direla berarekin eta "ondo" dagoela.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak