Aitor Mendiluze, Aitor Sarriegi, Amets Arzallus, Beñat Gaztelumendi, Igor Elortza, Maialen Lujanbio, Sustrai Colina eta Unai Iturriaga. Punta-puntako zortzi bertsolari aurrez aurre.
Irailaren 29an abiatu zen XVI. Bertsolari Txapelketa Nagusia eta 13 saiotan jokatutako kanporaketa eta finalaurrekoen ostean, 43 bertsolaritatik aipaturiko zortzirek eskuratu dute finalerako txartela. Hala, abenduaren 15ean Barakaldo bertsolaritzaren gune bilakatuko da.
Aspaldi agortu ziren finalerako sarrerak. Hala, bertatik bertara ez ezik, finala zuzenean jarraitu ahal izango da bai Hitzetik Hortzera saioan, ETBk emanaldi berezia eskainiko baitu abenduaren 15ean. Horrez gain, Bertsoa.com atarian ere ikusteko aukera egongo da.
Joanito Dorronsoro ikerlariak jantziko dio txapela irabazleari
Norgehiagoka bizia izango da, tentsio uneak biziko dira, barre egiteko bertsoak botako dituzte protagonistek batzuetan eta gai serioak landuko dituzte bestetan. Eta egun osoko jardunaren ostean, epaimahaiak hitz egiten duenean, 2013ko txapela janzteko ordua iritsiko da.
Irabazleak Joanito Dorronsoreren eskutik jantziko du txapela, bertsolaritzaren ikerlari eta aztertzaile aitzindaria da. Ikastolen mugimenduaren sortzaileetarikoa eta euskara lantzeko bertsoa baliapide egokia zela eta hezkuntzan bertsolaritza txertatzeko ahaleginetan saiatu zen lehenengoetarikoa.
Bestelako datuak
BECen egindako aurkezpenean hainbat datu eman dituzte. Beteak beste, 350 laguneko lantaldea arituko dela final egunean dena ongi atera dadin. Ikus-entzuleak lagunduko dituzte saioaren hasieran, bitartean eta amaieran.
Horrez gain, egunerako aldizkari berezia argitaratuko du Bertsozale Elkarteak eta entzule guztiek jasoko dute 24 orriko argitalpena. "Finalari buruz jakin beharrekoak, elkarteari buruzko informazioa eta bertsolaritzarekin lotutako hainbat proiekturen berri bilduko du aldizkariak".
Horrez gain, haurtzaindegi zerbitzua ipiniko dute, 3 eta 9 urte bitarteko haurrentzako, eta doako zerbitzua izango den arren, ezinbestekoa izango da aldez aurretik izena ematea. Gogora ekarri dute gainera, saioak irauten duen bitartean egongo dela zabalik.
Abenduaren 15eko ordutegia
09:00 Bizkaia Arenako ateen irekiera
11:00 Goizeko bertso saioaren hasiera
14:00 Bazkaria. Arratsaldeko saioa hasi arte Bizkaia Arena hustu egingo da
- Bazkari txartela dutenek 6. pabiloian bazkalduko dute.
- Etxekojana ekarri dutenek ere 6. pabiloian izango dituzte mahaiak eta eserlekuak.
16:00 Arratsaldeko saioaren hasiera
20:00-20:30 inguru Sari-emate ekitaldia
20:45 Parte hartzaileen prentsaurrekoa