40 urte bete ditu DYA Gipuzkoak eta ospatzeko, hainbat herritan erakusketak antolatzen dihardute. Bada, gaur, domeka, Bergaran ate irekien jardunaldia egin dute, Seminarioko patioan.
Eguraldiak lagundu ez duen arren, Arantzazu Lertxundi, DYA Gipuzkoako boluntaritzako arduraduna pozik zegoen, "herritar gutxi hurbildu badira ere, zer egiten dugun eta zergatik egiten dugun", ikasi dutelako gerturatu diren bergararrek.
Ibilgailuen erakusketa
Seminarioko patioan, DYAk, erreskate zein larrialdietarako erabiltzen dituen ibilgailu gehienak egon dira ikusgai; eta animatuenek autoa iraultzen duen simulagailua probatzeko aukera ere izan dute, gerrikoaren garrantziaz jabetzeko.
Besteak beste, anbulantziak, motorrak, salbamenduko ontziak zein mendiko erreskate unitateak egon dira Bergaran.
Istripu simulazioak
Erakusketaz gain, moto zein auto istripu baten simulazioa eta erreskate erakustaldia egin dituzte Seminarioan. Guztia, egunero DYA Gipuzkoakoek egiten duten lana herritarrei hurbiltzeko.