"Gutxitan bezala bota du elurra Arantzazun 08:30ean"

Halaxe kontatu digute Arantzazuko santutegian, gutxitan bota duela elurra gisa horretan Arantzazun, mara-mara. Askorik ez du loditu, ordea, izan ere, tartetan elurra eta tartetan euria ari du; hiru zentimetro inguruko elur-geruza osatu da, gutxi gora-behera.

Oñatiko udaltzainak 09:00ak inguruan abiatu dira Arantzazurako bidean eta Urtiagainetik gora bidea nahikoa elurtuta dagoela azaldu digute. SOS Deiak-era pasa dute abisua eta handik Diputaziora, elurra kentzeko makina joan dadin bertara. Edozein kasutan, frantziskotarrek esan digute autoak badabiltzala gora eta behera, Arantzazu gaineko plazatxoan badela mugimendua.

Aurtengo lehen elurtea izan da eta zurituta daude bailarako mendi tontorrak: "Zuri-zuri ikusten da Aloña", esan digute, adibidez, Oñatiko udaltzainek.

Arantzazun ez ezik, elurra ari du Deskargan eta AP-1 autobidean ere; arretaz gidatzea eskatzen da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.