Estilo ezberdineko melodiek jantziko dituzte eguen iluntzeak Aretxabaletan. Ostegun Akustikoak lehiaketa hastear da eta eman dituzte parte-hartzaileen izenak.
Hala, azaroaren 21ean Azkaiter Peloxen txanda izango da, Bergaratik zuzenean, blues, rock edo rhythm&blues doinuak entzungai izango dira Haizea tabernan.
Josu Zubiak, ostera, hilaren 28an joko du, Exprex tabernan. Oñatiarrak pop eta folk doinuz blaituko du azaroko azken eguena.
Etenaldi baten ostean, arrasater baten txanda izango da. Abenduaren 12an Jaime Lizaranzuren alter ego Jim TNTk country eta slide blues doinuekin giro atsegina sortuko du, Artano tabernan.
Eta azkenik, Saiatu Berriz bikotea Usurbildik bertaratuko da, pop kantuen bertsioak egitera. Dagda tabernaren jaun ta jabe egingo dira Josu Furundarena eta Garazi Artola.
Kontzertu guztiak 21:30ean hasiko dira.
Ikus-entzuleak epaimahai
Publikoa izango da Ostegun Akustikoak lehiaketako epaimahaia. Bi sari banatuko dira, nagusia 200 eurokoa izango da, eta 100 eurokoa, ostera, bigarrena. Besteen artean, originaltasuna eta ahots zein instrumentuen abilezia baloratuko dira.